Првиот вицепремиер, Изет Меџити, во гостувањето во емисијата „Дијалог во Лајм“ изјави дека измената на државниот грб не била дел од договорот за формирање на владината коалиција со ВМРО-ДПМНЕ.
Меџити нагласи дека коалицијата ВЛЕН е отворена за дискусија на различни теми, вклучително и оваа. Доколку се отвори прашањето за промена на грбот, како симбол кој потекнува од комунистичкиот период, тој смета дека тогаш би требало да се разгледа и евентуална адаптација на химната во духот на современите општествени промени.
„Начелно сме разговарале за прашањето за државниот грб и химната. Ако се смета дека грбот е остаток од комунистичкиот период, тогаш и химната потекнува од истото време, па затоа треба да ја прилагодиме на современите вредности и европскиот дух. Една од можностите е химната да остане само инструментална, без текст, или пак текстот да биде поинклузивен и поопфатен,“ изјави вицепремиерот Изет Меџити.
Тој додаде дека доколку се отворат овие прашања, треба да се разгледуваат во поширок пакет, вклучувајќи ја и измената на терминот „20 отсто“, кој би требало да биде заменет со терминот „албански јазик“.
