На денешната седница, Владата донесе одлука за ограничување на бруто-профитните маржи во трговијата на мало и големо за 102 групи производи, што опфаќа повеќе од 1.000 прехранбени и непрехранбени артикли. Покрај тоа, утврдени се и највисоки дозволени цени за одредени производи во малопродажбата и големопродажбата.
Заменик-министерот за економија и труд, Марјан Ристески, на прес-конференција изјави дека маржата на осум основни прехранбени производи, меѓу кои лебот, брашното тип 400 и 500, јајцата, јадењето масло, млекото, јогуртот и киселото млеко, ќе биде ограничена на пет отсто.
Дополнително, за група од 55 прехранбени производи, вклучувајќи месо и месни преработки, шеќер, млечни производи, маргарин, путер, конзервиран зеленчук и овошје, грав, ориз и тестенини, маржата ќе биде ограничена на десет отсто.
За останатите 39 групи производи, кои вклучуваат свежо овошје и зеленчук, средства за хигиена како детергенти, сапун, тоалетна хартија, бебешка храна и пелени, ќе се применува ограничување од 15 отсто на бруто-профитната маржа. Оваа мерка има за цел да спречи прекумерни поскапувања и да обезбеди поголема економска стабилност за граѓаните.
Двете одлуки ќе стапат во сила следниот ден откако ќе бидат објавени во службен весник и ќе траат до 30 април.
