Министерот за здравство од Коалицијата ВРЕДИ, Арбен Таравари, денеска изјави дека неговата партија е подготвена да разговара за сите отворени прашања од минатото, вклучувајќи ја и темата за измена на државниот грб.
Одговарајќи на новинарско прашање, Таравари нагласи дека Македонија е една од ретките постсоцијалистички држави кои сè уште не го смениле својот грб и истакна дека ВРЕДИ е подготвена да иницира поширока дискусија за решавање на низа прашања што останале нерешени во изминатите децении.
„Отворени сме за разговори за сите значајни теми. За жал, многу чувствителни прашања во изминатиот период беа игнорирани. Наша цел е преку конструктивен дијалог да најдеме решенија за прашања кои повеќе од 20-30 години останале нерешени. Зошто да не ги разгледаме во пакет и темите како грбот, химната, дефинициите во Уставот и други етнички прашања, ако постои таква потреба?“, кажа Таравари.
