Шефот на скопското обвинителство, Гаврил Бубевски, вчера соопшти дека возачот Васил Јованов, кој ја усмрти 22-годишната Фросина Кулакова, имал 0,9 промили алкохол во крвта кога ја удрил девојката на пешачкиот премин на булеварот „Партизански одреди“. Бубевски објасни дека границата за „состојба на пијанство“ се поставува над 1,5 промили, што значи дека Јованов бил под тој праг.
Иако во јавноста се појавија шпекулации и информации дека Васил возел со брзина од 130 километри на час во моментот на инцидентот, Бубевски истакна дека точната брзина сè уште не е утврдена. Според него, на почетната проценка од страна на истражителите, се наведува дека се работи за поголема брзина, но ова ќе се потврди преку вештачење.
„Во зависност од положбата на возилото по ударот и други фактори, првичната проценка е дека возилото се движело со поголема брзина. Ова се проверува преку вештачење, а сите докази се во процес на собирање. Веќе се прибираат снимки од системот Сејф Сити, како и од камери на околните објекти, а контактирано е и вешто лице кое ќе користи лиценциран софтвер за точно да ја утврди брзината на возилото во моментот на несреќата“, изјави Бубевски во вчерашното издание на емисијата „Топ тема“.
