Премиерот Христијан Мицкоски денеска изјави дека јавните здравствени установи ќе добијат зголемен буџет од повеќе од сто милиони евра во споредба со минатата година. Тој ова го соопшти одговарајќи на новинарско прашање во Општина Кочани.
„Буџетот за јавните здравствени установи оваа година ќе биде за 100 милиони евра повеќе во однос на минатогодишниот. Ако лани буџетот беше околу 27 милијарди денари, оваа година тој ќе изнесува околу 33,2 милијарди денари, што е приближно 540 милиони евра“, истакна Мицкоски.
Исто така, планирано е и зголемување на платите во здравствениот сектор, кои се очекува да пораснат за пет до осум отсто во текот на месец мај.
