Славата и богатството не успеале да го задржат во светот на световните успеси. Георгиос Теохарис од Лерин, по потекло Македонец, кој достигнал врвни височини во шампионатите за борење и освоил 11 медали, одлучил да се повлече од светот, објави „Религија.мк“.
Пред околу две децении, тој ја напуштил својата кариера, семејството, пријателите и домот, и заминал на Света Гора, во Катунакија, карпест предел на јужниот дел од Атонскиот полуостров.
По пристигнувањето на Света Гора, Георгиос го прифатил монашкиот живот и го добил името отец Василиј. Според Македонците од Егејска Македонија, тој е единствениот монах кој ги изговара молитвите на македонски јазик.
„Тој е од Лерин. Пред многу години замина на Света Гора, каде што во пештера чита молитви на македонски. Тој е единствениот од целата Цариградска патријаршија, од Ерусалим па наваму, кој се моли на нашиот јазик“, вели Василис Каритидис од Леринско на Фејсбук.
Монахот отец Василиј води строг аскетски живот. Според Василис, кој е лекар и често престојува на Света Гора, отец Василиј живее исклучиво од пост и молитва.
„Тој живее само на леб и печурки, прави супа или лесна чорба. Еден леб му трае 38 дена. Има 75 години, а од него зрачи светлина и милост“, раскажува Василис.
Извор: Религија.мк
