Веб-страницата „Global Firepower“ од 2006 година редовно објавува годишни извештаи и рангирања на националните вооружени сили, класифицирани од најсилни до најслаби. Ова рангирање се базира на сеопфатен индекс на моќност, кој се пресметува според повеќе од 60 различни фактори, вклучувајќи воена опрема, финансиски ресурси, географски услови и достапна работна сила.
Оваа година, листата вклучува 145 земји, при што на првото место доминираат Соединетите Американски Држави. Русија и Кина го делат второто и третото место со идентични индекси на моќност, што укажува на нивната значајна воена сила.
Индија се позиционира на четвртото место, додека Јужна Кореја е петта. Првите десет ги заокружуваат Велика Британија, Франција, Јапонија, Турција и Италија, кои исто така се издвојуваат како глобални воени сили.
Кога станува збор за земјите од територијата на поранешна Југославија, Србија е највисоко рангирана, заземајќи го 63-то место. Македонија, пак, е рангирана на 112-то место, што ја позиционира во втората половина од листата.
