Министерството за внатрешни работи (МВР) го постави проектот „Безбеден град“ како еден од своите најзначајни приоритети, изјави министерот за внатрешни работи, Панче Тошковски, при претставувањето на плановите за имплементација.
Министерот објасни дека проектот е замислен како сеопфатен безбедносен систем што ќе биде имплементиран до крајот на 2025 година. Неговата реализација вклучува поставување современа инфраструктура за видео надзор, која ќе се состои од мрежа на камери поврзани преку оптички кабли, со цел да се обезбеди ефикасна покриеност на урбаните средини.
„Ова не е само техничка задача,“ истакна Тошковски. „Покрај инсталацијата на опремата, неопходно е да се обезбедат сите потребни дозволи, да се усогласат институциите и да се извршат измени во законската регулатива. Веќе работиме на ново предлог-законско решение кое ќе ги постави темелите за успешна примена на системот“.
Една од главните цели на проектот „Безбеден град“ е да се зголеми сигурноста на улиците и јавните простори. Министерот нагласи дека новиот систем ќе помогне во идентификување и санкционирање на сите оние кои се однесуваат неодговорно или го загрозуваат јавниот ред.
„Оние што ги прекршуваат правилата ќе се соочат со санкции, додека граѓаните кои ги почитуваат законите можат да бидат спокојни. Овој систем е тука да го заштити јавниот интерес и да обезбеди безбедна средина за сите,“ рече Тошковски.
