Меѓународната полициска организација Интерпол издаде потерница по Џонатан Емануел Кардон Кастиљо (23), водач на екстремната еврејска секта Лев Тахор. Според официјалните податоци, Кастиљо е баран од властите во Гватемала под сериозни обвиненија, кои вклучуваат трговија со луѓе, силување и злоупотреба на малолетници.
Во потерницата на Интерпол се наведува дека неговото апсење е приоритет, бидејќи се работи за лице поврзано со организирани активности кои имаат глобални последици врз безбедноста и човековите права.
Сектата Лев Тахор привлече внимание и на Балканот во периодот од крајот на 2021 и почетокот на 2022 година, кога околу триесет нејзини членови престојуваа во Босна и Херцеговина. Некои од нив подоцна биле забележани и во Македонија.
Според извештаите, членови на групата најпрво престојувале во Куманово, каде што нивното движење било под надзор на полицијата. Подоцна, дел од нив биле преместени во хотел во охридското село Горно Лакочереј, а други биле сместени во хотел во Скопје.
