Премиерот Христијан Мицкоски јавно го изрази своето незадоволство од трговците, откако беше забележано зголемување на цените на производите кои не се опфатени со т.н. „Новогодишна кошница“.
На денешната владина седница, Мицкоски најави дека ќе побара од Државниот пазарен инспекторат (ДПИ) да спроведе „робусна и жестока акција“ против шпекулативните практики на некои трговски ланци. Според него, некои трговци намерно ги зголемиле цените на основни прехранбени производи како масло за јадење, леб, млеко, млечни производи, шеќер, сол и јајца, за да ги компензираат намалените цени на производите од Новогодишната кошница.
„Трикови не може. Оваа влада нема да толерира вакво однесување. Ќе се справиме жестоко со оние кои мислат дека можат да нè надмудрат. Ги повикувам големите трговски ланци да го преиспитаат своето однесување,“ изјави Мицкоски.
Тој нагласи дека од ДПИ ќе бара детална анализа за тоа како се движеле цените на производите во изминатиот период, особено во последните 30 дена.
