Претседателот на Србија, Александар Вучиќ, денес изјави дека ја „подигнал“ земјата и дека „не му паѓа на памет“ да бега од „олошот кој ја ограбил и приватизирал цела Србија“.
На прашањето за изјавите на претставниците на опозицијата, кои сметаат дека едно од решенијата за смирување на протестите и блокадите во Србија е тој да ја напушти земјата, слично како сирискиот претседател Башар Ал Асад, Вучиќ рече дека не се плаши од „најголемите крадци и криминалци како Јешиќ, Ѓилас, Алексиќ и Миливојевиќ“.
„Постојат моменти во историјата кога, поради одредени настани, на површина испливува најлошата нечистотија, талог. Доаѓа момент кога мислат дека е време тие да испливаат. Јас да бегам затоа што ја подигнав Србија, затоа што не тепам жени како нив, затоа што не се предадов на оние кои ја уништија оваа земја? Никогаш нема да бегам“, изјави Вучиќ.
