Македонската Традиционална Таеквон-до Федерација, под водство на претседателот Марјанчо Лазаревски и националниот селектор Саша Поповски, од 13-ти до 15-ти декември учествуваше на престижниот меѓународен Таеквон-до ИТФ А класа натпревар „10 Кинг оф Таеквон-до“ во Солун, Грција.
Ова големо спортско случување привлече 1239 натпреварувачи од 17 земји ширум светот, што го прави еден од најсилните турнири во календарот на Таеквон-до.
На натпреварот, боите на Македонија ги бранеа 8 натпреварувачи кои, и покрај големата конкуренција и предизвиците од пристрасното судење, постигнаа забележителен успех. Македонските таеквондисти освоија вкупно 6 медали – 1 златен и 5 бронзени, докажувајќи го својот квалитет на меѓународната сцена.
Особено впечатлив настап имаше Миа Танеска, која е една од најперспективните млади таеквондистки во Македонија. Иако само пред неколку дена наполни 12 години и со тоа влезе во повисоката категорија на кадетки (12-13 години), Миа успеа да ја наметне својата доминација. Таа се закити со златен медал, совладувајќи пет противнички и повторно искачувајќи се на највисокото место на пиедесталот.
