Утринава во Скопје беа спроведени опсежни активности на повеќе локации, во рамки на истрага што произлегува од кривична пријава поднесена од Одделот за сузбивање организиран криминал и корупција.
Обвинети се осум физички лица, меѓу кои и еден поранешен премиер, соопшти министерот за внатрешни работи Панче Тошковски на денешната прес-конференција.
„За време на претресите, кај еден од осомничените се пронајдени парични средства во висина од околу 40.000 евра, додека кај друг осомничен се пронајдени 20.000 евра. Две лица кои се опфатени со истрагата засега се недостапни“, изјави Тошковски.
Тој нагласи дека истрагата е во почетна фаза и најави дека во следните денови ќе бидат објавени дополнителни информации поврзани со случајот.
Во меѓувреме, неколку медиуми претходно објавија дека во рамките на оваа истрага, која е поврзана со државната Лотарија, освен првиот вицепремиер Артан Груби, е опфатен и поранешниот премиер Димитар Ковачевски.
