Македонскиот шоумен Бојан Јовановски објави дека се повлекува од заедничкиот проект со јутјуберот Стефан Лазаров – наградна игра што привлече големо внимание на социјалните мрежи, благодарение на бројните и вредни награди што беа ветени за учесниците.
Контроверзиите околу проектот дополнително се засилија откако инспектори од Управата за јавни приходи (УЈП) синоќа извршија рација во локал во Штип. Таму, Јовановски и Лазаров организирале настан поврзан со наградната игра, но без соодветна дозвола, пренесе радио „Лидер“.
На својот Инстаграм профил, Боки 13 денеска се огласи и изјави дека се повлекува од проектот, наведувајќи како причина здравствени проблеми.
„Поради нанесениот и преживеан стрес, а во насока на мојата влошена здравствена состојба, ви соопштувам дека во овој момент се повлекувам од моето јавно појавување како гостин и промотивно лице на забавниот проект ‘Giveaway’, кој е во организација на мојот најдраг пријател Стефан Лазаров.
Му давам максимална морална и пријателска поддршка на Стефан за успешно завршување на проектот.
За сите останати прашања, коментари и ставови, одговорите ќе ги дадам при моето гостување во Лазаров поткаст, во вторник (17 декември) во 21 часот.
Ви благодрам за вашата најискрена поддршка, која ми ја дадовте во огромен број во овој период.
П.С. Бедна е среќата која се темели на нечија болка и солзи“, објави Боки 13.
Лазаров за наградната игра кажа дека не прави ништо погрешно, а во минатото поминал и низ поголеми притисоци.
Лазаров, исто така, посочи дека се откажани сите планирани настани, но наградната игра ќе продолжи и извлекувањата ќе се одвиваат во неговото студио „Лазаров Подкаст“.
