Бојан Јовановски, познат во јавноста како Боки 13 и осуден во случајот „Рекет“, е прогласен за инвалид од прв степен, а лекарите препорачуваат редовна физичка активност како дел од неговата медицинска терапија. Ова беше истакнато во конзилијарното мислење на тим од лекари, кое беше презентирано пред Кривичниот суд и послужи како основа за неговото ослободување од притвор.
Одлуката на судот се потпира на обемна медицинска документација, изготвена и потврдена од повеќе од десет врвни доктори-специјалисти и професори од Универзитетската клиника св. „Наум Охридски“. Во прилог на медицинската евиденција, Јовановски приложи докази за сериозноста на својата здравствена состојба, нагласувајќи дека досега бил подложен на пет хируршки интервенции.
Според доставените документи, неговата состојба бара континуирана медицинска грижа и специфична физичка активност за да се одржи функционалноста и да се спречат понатамошни здравствени компликации.
