Вистинска паника се случувала меѓу пријателите и блиските на Ава Карабатиќ, откако на социјалните мрежи се проширила информација дека старлетата наводно го загубила животот во Загреб. Дополнителна вознемиреност предизвикале и аудиопораките во кои се тврдело дека таа паднала од тераса.
Веста брзо се проширила низ регионот, а дел од нејзините пријатели дури јавно се простувале од неа, убедени дека се случила голема трагедија. Сепак, по неколку часа неизвесност следувал целосен пресврт – Ава се огласила и потврдила дека е жива.
Во објава на Инстаграм таа објаснила дека навистина имала здравствени проблеми и дека завршила во ургентен центар, но категорично ги демантирала тврдењата дека си го одзела животот.
Карабатиќ посочила дека, според неа, зад ширењето на лажната информација стои лице кое претходно имало конфликт и физичка пресметка со нејзиниот пријател Марио. Токму од тоа лице, како што тврди, потекнувале и вознемирувачките гласовни пораки.
„Сакам сите да знаат дека сум добро. Штотуку се разбудив. Точно е дека ми се слоши и дека побарав лекарска помош, но никогаш не би кренала рака на себе. Не можам да поверувам дека некој измислил ваква приказна и предизвикал толкава паника“, порачала таа.
Таа најавила и дека ќе преземе правни чекори поради ширењето на, како што ги нарекла, лажни и вознемирувачки информации. Притоа открила дека нејзините најблиски биле особено погодени од случувањата.
Ава признала дека физички се чувствува добро, но дека целиот настан оставил сериозни последици врз нејзината психичка состојба. Поради преживеаниот стрес најавила дека ќе побара стручна психолошка поддршка.
Дополнителен интерес предизвикало и видео кое Ава го споделила на својот Инстаграм-профил. На снимката, според објавените информации, може да се види жестока расправија во станот, во која учествувале нејзин пријател, нејзината мајка и маж кој бил присутен таму.
Повод за конфликтот, наводно, била загриженоста на пријателот поради алкохолот што ѝ бил обезбеден на Ава и покрај нејзината здравствена состојба.
На видеото се слуша како Марио Томас реагира бурно и ги обвинува присутните дека не се свесни колку сериозна е ситуацијата.
Тој изразил страв дека на Ава ѝ е потребна медицинска помош, а не алкохол, по што расправијата станала уште поинтензивна.
Во еден момент дошло и до физички контакт меѓу него и мажот кој се наоѓал во станот. Според снимката, мажот го фатил Марио за лицето и устата, додека жената која била во близина се обидувала да ја смири ситуацијата.
Марио, пак, продолжил да инсистира дека присутните треба да повикаат полиција, обвинувајќи ги за несоодветно однесување кон Ава.
Информацијата за наводната смрт првично ја објавила нејзината пријателка Цвита, која преку профилот на Ава објавила потресна порака за простување. Во неа тврдела дека старлетата паднала од кат и дека повеќе не е меѓу живите.
Набргу потоа се огласил и Марио Томас, кој во емотивна реакција зборувал за случувањата и за времето што го поминал со Ава непосредно пред да се прошири веста.
Дополнителна забуна предизвикала уште една аудиопорака, во која непознато лице повторно ја повторувало приказната дека таа паднала од тераса.
Но, по сите вознемирувачки објави и часовите поминати во неизвесност, самата Ава ставила крај на шпекулациите.
Таа потврдила дека е жива, дека се опоравува и дека најважно во моментов ѝ е сопственото физичко и ментално здравје.
Веста ја пренесува Kurir.rs
