Фото: Принтскрин
Украинскиот претседател Володимир Зеленски, по повод Меѓународниот ден на човековите права, што се одбележува денес, упати апел до светот за обединување во борбата против „диктаторските режими“.
„Овој Ден на човековите права беше обележан со потресни сведоштва и фотографии од сириските затвори и центрите за тортура што беа откриени по повлекувањето на режимот на Башар ал Асад. Тие места беа симбол на страдање и нечовечност, каде што луѓето со години беа изложени на понижувања, сурово насилство, тепања, мачења и друг вид насилство. Илјадници невини мажи и жени поминаа низ тие фабрики на ужас,“ напиша Зеленски на својот канал на Телеграм, цитирајќи го украинскиот „Интерфакс“.
Тој го нагласи рускиот претседател Владимир Путин како клучен поддржувач на Асадовиот режим и додаде дека заедничка карактеристика на овие системи е нивната зависност од насилство за одржување на моќта.
„Мора да има одговорност за ваквите грозоморни дела и сериозни нарушувања на човековите права. Луѓето заслужуваат правда. Всушност, само Путин и Асад треба да се најдат зад решетки, а не илјадниците невини жртви кои со години биле неправедно затворени“, заклучи Зеленски.
