Ново значајно археолошко откритие е направено на локалитетот Расница, во близина на струшкото село Корошишта. Археолозите таму откриле богато воено погребување кое датира од архајскиот период и содржи бројни предмети поврзани со воинскиот статус на погребаниот.
Меѓу откриените предмети се наоѓаат штит, шлем, копја и меч, но и вредни артефакти изработени од злато, бронза и килибар. Богатството и разновидноста на прилозите укажуваат дека станува збор за погребување на личност со особено значајна општествена и воена улога.
Резултатите од годинашните археолошки истражувања беа презентирани пред јавноста од страна на Археолошкиот музеј. Истражувањата ги предводи археологот д-р Перо Арџанлиев, а на презентацијата присуствуваа и директорката на Музејот, Магдалена Манаскова, како и директорката на Управата за заштита на културното наследство, Весела Честоева.
Според археолозите, новите наоди можат да дадат дополнителни сознанија за начинот на кој било организирано општеството, улогата на воините и погребните традиции во Охридско-струшкиот крај во VI век пред нашата ера.
Расница привлече поголемо внимание уште во 2024 година, кога истражувањата открија монументална гробница со исклучително вредни предмети. Тогаш беа пронајдени, меѓу другото, бронзен шлем украсен со златни апликации, златен надградник, сребрени игли и садови.
Најновото откритие дополнително го потврдува археолошкиот потенцијал на овој локалитет и отвора можност за нови сознанија за историјата на древните заедници кои живееле во овој дел од Македонија.
Веста ја пренесува 4news.mk
