Воз полн со патници се судри со камион кој останал заглавен на железнички премин во близина на Гдањск. Снимките од моментот на ударот покажуваат колку била жестока несреќата.
Стравична железничка несреќа ја потресе Полска, откако патнички воз удрил во камион со босански регистарски ознаки, кој од засега непознати причини останал заглавен на железнички премин во населбата Гдањск-Липце.
Силниот удар целосно ја уништил приколката од камионот, а делови од возилото биле расфрлани околу пругата. Инцидентот бил снимен и од камерите за видеонадзор, а снимките подоцна ја покажале силината на судирот.
Според полските противпожарни служби, до несреќата дошло околу 12:30 часот. Во патничкиот воз, кој сообраќал на релацијата Гдиња – Зјелона Гора, имало околу 300 патници.
Иако сцените по ударот изгледале драматично, поголема трагедија била избегната. Патниците успеале сами и безбедно да го напуштат возот.
На местото на несреќата медицинските екипи прегледале четири лица – возачот на камионот, кондуктерот и двајца патници. Возачот на камионот, сепак, морал да биде пренесен во болница за дополнителен медицински третман.
Поради судирот железничкиот сообраќај на овој дел од пругата бил целосно запрен. За да не останат блокирани, патниците биле пренасочени со автобуси кон Тчев.
По несреќата, полските железници ги објавиле снимките од надзорните камери со цел да испратат сериозно предупредување до возачите.
Од железницата потсетуваат дека заглавувањето на возило на премин со спуштени рампи може да биде прашање на живот или смрт. Во таква ситуација, возачите не треба да останат во возилото и да чекаат возот да помине.
Веста ја пренесува Слободен печат.
