Министерството за образование и наука (МОН) ги објави резултатите од најновото меѓународно тестирање за тенденции во изучувањето на математиката и природните науки (ТИМСС) за 2023 година. Македонските ученици од четврто одделение се пласираа на 47 место по природни науки и на 44 место по математика, во конкуренција од вкупно 48 земји.
На тестирањето, кое за првпат беше спроведено електронски, учествуваа ученици кои наставата ја следат на македонски и албански јазик.
На врвот на листата и по математика и по природни науки се наоѓа Сингапур, кој и понатаму го задржува статусот на глобален лидер во квалитетот на основното образование.
Од МОН велат дека ваквите резултати јасно укажуваат на потребата од темелна реформа во воспитно-образовниот систем.
„Резултатите од ТИМСС ни покажуваат дека е неопходно да се вложат дополнителни напори за подобрување на знаењата и вештините на учениците, со посебен фокус на математиката и природните науки. Потребно е да се зајакне квалитетот на наставата, методологијата и достапноста на современи наставни алатки“, соопштија од Министерството.
