Основното јавно обвинителство во Кавадарци поднесе Обвинителен акт до надлежниот суд за кривично дело – обид за убиство, согласно член 123 став 2 точка 2, во врска со член 19 (обид) и член 12 став 2 (битно намалена пресметливост).
Обвинетата, на 10 септември годинава, во семејниот дом во Кавадарци, се обидела да ја лиши од живот својата мајка со која живеела во заедничка куќа. Според обвинението, додека жртвата спиела, обвинетата ја нападнала со чекан, нанесувајќи повеќе удари во пределот на главата и предизвикувајќи тешки телесни повреди. По извршениот напад, обвинетата го фрлила чеканот во дворот и го прекинала обидот за убиство, не довршувајќи го делото.
Извршените вештачења покажуваат дека делото е извршено во состојба на битно намалена пресметливост, која произлегла од психички растројства, комбинирана со повеќекратна употреба на лекови и психоактивни супстанции. Овие фактори ја намалиле способноста на обвинетата да ги контролира своите постапки во моментот на извршување на кривичното дело.
Обвинителството побара од судот да го разгледа случајот земајќи ги предвид сите околности, вклучувајќи ја и состојбата на намалена пресметливост на обвинетата, како и тежината на предизвиканите повреди врз жртвата.
