Над 1.200 ученици учествуваа во формирањето на најголемото македонско знаме, соопшти денеска градоначалникот на Општина Бутел, Дарко Костовски.
Во својата објава на социјалната мрежа Фејсбук, Костовски изрази гордост и истакна дека националното знаме и химната се важни симболи на државноста, кои треба да бидат почитувани од сите граѓани.
„Стоиме заедно, обединети под светлината на нашето македонско знаме! Во црвено и жолто, го формиравме најголемото македонско знаме, кое е симбол на независноста, заедништвото и достоинството. Благодарност до Андријана Јаневска, која со својот маестрален настап ја изведе македонската химна, давајќи посебна тежина на овој настан,“ напиша Костовски.
Тој додаде дека овој чин е доказ за љубовта кон татковината и почитта кон нејзините историски вредности. Акцијата, покрај тоа што ги слави националните симболи, има за цел да го поттикне развивањето на патриотскиот дух кај младите.
„Нашата мисија е да ги научиме младите да ја сакаат, почитуваат и штитат својата татковина. Знамето и химната се симболи што нѐ повикуваат на обединување и негување на заедништвото. Овој момент ни дава надеж и ја зајакнува љубовта кон Македонија, повикувајќи нѐ да ги чуваме нашите национални белези и симболи,“ потенцираше градоначалникот.
