Граѓанската иницијатива „Зелен хуман град“ најавува протестен марш против загадениот воздух во главниот град, кој ќе се одржи во вторник, 10 декември, со почеток во 16:00 часот.
Маршот ќе започне пред Министерството за животна средина, продолжувајќи пред Собранието и Владата, како дел од нивните напори да го привлечат вниманието на институциите и јавноста кон сериозноста на проблемот со загадувањето.
Организаторите бараат итна изработка на план за сообраќаен режим, кој ќе се активира во случаи кога концентрацијата на загадувачки материи ги надминува дозволените гранични вредности, особено ако состојбата трае подолго од 24 часа.
Дополнително, се инсистира на усвојување на Правилник за планирање, проектирање, изградба и одржување на современа велосипедска инфраструктура, со цел да се поттикне користењето на еколошки алтернативи за транспорт.
