Последните моменти од животот на двајцата грчки пожарникари кои загинаа додека се бореле со огнената стихија во областа Ретимно откриваат потресна слика за условите со кои се соочиле на терен.
Според првичните информации од истрагата, 25-годишниот Пантелис Дијамантакис и 58-годишниот Манолис Стратидакис најверојатно се обиделе да се спасат откако ситуацијата на местото на пожарот нагло се влошила. Тие го напуштиле возилото, но за само неколку секунди огнот се проширил со огромна брзина, а густиот чад целосно им го блокирал видикот.
Нивните колеги биле во непосредна близина – на околу 20 до 30 метри од местото каде што се случила трагедијата. Токму тие први ги пронашле телата на двајцата пожарникари, надвор од службеното возило со кое пристигнале да го гаснат пожарот што зафатил ниска вегетација.
Сведоштвата на нивните колеги укажуваат дека силниот ветер предизвикал нагло разгорување на огнот, создавајќи исклучително опасни услови. Густиот чад ја намалил видливоста речиси на нула, поради што пожарникарите не можеле ниту да се ориентираат, ниту да забележат што се случува на само неколку метри од нив.
Според проценките на припадниците на противпожарната служба, двајцата мажи веројатно се обиделе да се повлечат и да најдат побезбеден пат за излез. Сепак, екстремната температура и непробојната чадна завеса им ја одзеле секоја можност за навремена реакција.
„Чадот бил толку густ што практично им го затворил видикот. Се нашле во зона со огромна температура и многу тешки услови за движење. Во вакви ситуации ризикот е исклучително висок“, изјавил претставник на противпожарната служба.
Колегите на загинатите пожарникари велат дека и покрај тоа што биле блиску едни до други, немале начин да им помогнат бидејќи видливоста била речиси никаква.
„Не гледавме ниту два метри пред нас. Чадот беше насекаде и беше невозможно да сфатиме дека неколку чекори подалеку нашите колеги се борат за живот“, сведочел еден од пожарникарите.
Првичните наоди покажуваат дека двајцата пожарникари најверојатно останале само неколку метри подалеку од своето возило, откако во последен момент се обиделе да се спасат од огнената бура.
Веста ја пренесува Telegraf.rs
