Околу 100.000 граѓани синоќа излегоа на улиците на шпанскиот град Валенсија, изразувајќи го својот револт против управувањето на властите со катастрофалните поплави што го погодија регионот кон крајот на октомври. Овие поплави, кои однесоа повеќе од 230 човечки животи, предизвикаа огромна материјална штета и оставија длабоки траги врз локалното население.
Демонстрантите маршираа низ центарот на Валенсија, носејќи транспаренти и извикувајќи барања за одговорност од властите. На чело на колоната беше поставена џиновска табла со натписот „Мазон, оставка“, со јасна порака насочена кон Карлос Мазон, конзервативниот претседател на регионот Валенсија, кој е обвинет за неефикасно справување со последиците од трагедијата.
Протестот беше организиран од локални граѓански и синдикални организации, кои посочуваат дека регионот е најтешко погоден од разорните поплави на 29 октомври.
