Окружниот суд во Љубљана донесе пресуда со која поглаварот на Српската православна црква, патријархот Порфириј, е осуден на условна казна затвор во траење од четири месеци, со рок на проверка од една година. Покрај тоа, му е изречена и условна парична казна, која исто така ќе важи под истиот условен период.
Случајот произлегува од долгогодишниот правен спор меѓу поранешниот љубљански парох Жељко Лубарда и раководството на Српската православна црква.
Според наводите на Лубарда, тој како законски застапник на Црковната општина Љубљана поднел кривична пријава против тогашниот старешина на храмот, Перан Бошковиќ, поради сомнежи за финансиски неправилности. Лубарда тврди дека по одбивањето да ја повлече пријавата и да го смени својот исказ, бил изложен на сериозни притисоци и мобинг на работното место.
Тој дополнително наведува дека тогашниот митрополит загрепско-љубљански Порфириј донел одлука за негово преместување од Словенија во Хрватска. Бидејќи не ја прифатил таа одлука, му било забрането да извршува свештенички должности, а подоцна бил разрешен од свештеничкиот чин со одлука на црковните власти.
Во претходна постапка, словенечките судови правосилно утврдиле дека Лубарда бил жртва на психолошко малтретирање на работното место. Токму тие судски наоди биле искористени како основа за покренување на кривичната постапка против Порфириј и Црковната општина Љубљана.
Од Српската православна црква ги отфрлаат сите обвинувања, оценувајќи дека станува збор за неосновани постапки што со години ги иницира поранешен, разрешен свештеник. Во нивното соопштение се нагласува дека именувањето и преместувањето на свештениците е исклучиво во надлежност на надлежниот епископ.
Веста ја пренесува Pravoucentar.rs
