Ново видео со вознемирувачка содржина, на кое е прикажано меѓуврсничко насилство, предизвика силни реакции во јавноста. Снимката, која се однесува на случај од Куманово, се појави во јавноста откако најпрво беше објавена во серијалот „Без цензура“ на новинарката Лиридона Вејсели, а потоа беше доставена и до медиумите.
Според достапните информации, инцидентот се случил пред околу еден месец. Иако случајот бил обид да се пријави во Полициската станица Куманово, жртвата официјално дала исказ дури денеска.
На видеото се гледа како три девојчиња физички напаѓаат друго девојче, нанесувајќи му повеќе шлаканици и клоци. Во текот на нападот, жртвата е влечена за коса, туркана кон ѕид и изложена на дополнително понижување, додека не покажува отпор и очигледно е во состојба на шок. Според неофицијални информации, една од напаѓачките има 19 години.
Снимката првично била споделена на социјалната мрежа „Снепчет“, придружена со заканувачки опис кој дополнително ја вознемири јавноста.
Од Министерството за внатрешни работи информираат дека случајот активно се истражува.
„СВР Куманово, во координација со Основното јавно обвинителство Куманово, презема мерки и активности за целосно расчистување на случајот. По завршувањето на постапката, јавноста ќе биде навремено информирана“, соопштија од МВР.
Ова е втор сериозен случај на меѓуврсничко насилство што излегува во јавноста во текот на овој месец. Претходно, во скопската населба Аеродром беше објавена снимка на која малолетно девојче беше принудено да клекне, да се извинува и да ветува дека нема да го пријави нападот, додека беше удирано и снимано од поголема група врсници.
Повторното појавување на вакви снимки отвори нови прашања за безбедноста на младите, улогата на социјалните мрежи во ширењето на насилството и потребата од побрза институционална реакција.
Веста ја пренесува Слободен печат.
