Легендарниот македонски актер Гоце Тодоровски се наоѓа на болничко лекување, а информацијата за неговата хоспитализација ја споделија негови блиски пријатели и обожаватели на социјалните мрежи.
Мубедин и Џело го посетија актерот во болница, по што објавија заедничка фотографија и му упатија искрени желби за што поскоро закрепнување и враќање на сцената.
„Од срце Ви посакуваме брзо оздравување, добро здравје и повторно да Ве гледаме таму каде што најмногу припаѓате – на сцената. Со Вашите улоги пораснавме, се смеевме и создадовме спомени што ќе останат засекогаш“, порачаа тие.
Гоце Тодоровски важи за едно од најголемите имиња на македонското глумиште. Со своите бројни улоги во театарот, филмот и телевизијата остави длабока трага во македонската култура, а посебно е препознатлив по незаборавните ликови во култната серија „Македонски народни приказни“, со кои освои генерации гледачи.
Во моментов не се соопштени официјални информации за причините поради кои актерот е хоспитализиран. Неговите бројни почитувачи продолжуваат да му испраќаат пораки со поддршка и желби за брзо закрепнување.
Веста ја пренесува Plusinfo.mk
