Марко Маринковиќ – Слаткар беше меѓу бројните музичари и пријатели кои вчера му оддадоа последна почит на Владо Јаневски, испраќајќи го на неговото вечно почивалиште.
По погребната церемонија, Слаткар преку социјалните мрежи сподели емотивна приказна која досега не била позната на јавноста. Тој откри дека со години чува заедничка песна што ја снимиле со Владо, но никогаш не ја објавил.
„Со години ја чувам песната што ја создадовме заедно. Не затоа што не верував во неа, туку затоа што секогаш кога соработувам со некого кого исклучително го почитувам, сакам да го дадам најдоброто од себе. Постојано мислев дека може да биде уште подобра и затоа ја одложував, убеден дека ќе имаме можност повторно да работиме на неа. За жал, таа можност никогаш не дојде“, напиша Слаткар.
Тој објави и краток дел од нумерата, најавувајќи дека ќе ја заврши и ќе ја претстави пред јавноста на роденденот на Владо Јаневски.
„Ова е само мал дел од песната. Ветувам дека ќе ја довршам и ќе ја објавам на неговиот роденден. Благодарам за довербата, Владо. Благодарам за сè што направи за сите нас. Ќе ми недостигаш. На сите ќе ни недостигаш“, порача Слаткар во својата емотивна објава.
Веста ја пренесува Racin.mk
