Професорка на Универзитетот „Гоце Делчев“ во Штип е приведена под сомнение дека побарала и примила 300 евра од студент за да му овозможи да го положи испитот.
Според информациите од Министерството за внатрешни работи, полициски службеници од СВР Штип на 29 јуни, околу 11:45 часот, ја лишиле од слобода Т.А. (39) од Штип. Против неа постои сомнение дека го сторила кривичното дело „примање поткуп“.
Случајот бил пријавен неколку дена претходно од К.Б. (26), државјанин на Турција, кој привремено престојува во Штип и студира на Универзитетот „Гоце Делчев“. Според неговата пријава, професорката побарала 300 евра за да му овозможи успешно да го положи испитот, кој повторно требало да го полага на 29 јуни.
По пријавата, во координација со Основното јавно обвинителство во Штип, полицијата организирала акција. На студентот му биле дадени три претходно криминалистичко-технички обработени банкноти од по 100 евра.
Професорката била приведена непосредно по примањето на означените пари, кои веднаш биле одземени како доказ. По апсењето, таа била задржана во полициска станица.
Од МВР информираат дека по целосното расчистување и документирање на случајот, против осомничената ќе биде поднесена соодветна кривична пријава.
Веста ја пренесува Skopje1.mk
