Во спомен на македонската музичка легенда Владо Јаневски, утре со почеток во 20 часот на платото пред арената „Борис Трајковски“ ќе се одржи комеморативен собир, на кој граѓаните ќе имаат можност достоинствено да се простат од еден од најголемите домашни музички уметници.
Од „Прагма продукција“ упатија јавен повик до сите кои ја сакаа неговата музика, ги пееја неговите песни и со години го следеа неговото творештво, да бидат дел од ова емотивно збогување.
„Нека неговите песни одекнат уште еднаш, нека светлината од свеќите биде нашето ‘благодарам’, а нашето присуство доказ дека големите уметници никогаш не се забораваат“, порачуваат од продукцијата.
Собирот ќе биде исполнет со музика, тишина и спомени, како симболична почит кон човекот чии безвременски хитови оставија неизбришлива трага во македонската музичка сцена. Присутните ќе имаат можност уште еднаш, преку неговите песни, да му кажат последно збогум.
„Легендите не заминуваат засекогаш. Тие продолжуваат да живеат преку своето дело и во срцата на луѓето што ги сакаат“, се наведува во објавата на „Прагма продукција“.
Веста ја пренесува Skopje1.mk
Објава: Прагма Продукција
