Координаторот на советничката група на ВМРО-ДПМНЕ во Советот на Град Скопје, Мартин Стојановски, вечерва по завршувањето на средбата со претставниците на приватните превозници, соопшти дека предложиле зголемување на тарифата по изминат километар од 70 на 100 денари. Оваа промена би важела од 1 декември оваа година до мај 2025 година. Стојановски повика на што поскоро свикување на вонредна седница на Советот на Град Скопје, со цел ова прашање да биде вклучено како точка на дневен ред и да се разгледаат барањата на превозниците.
Приватните превозници ја изразија својата поддршка за предложеното решение и најавија дека се подготвени да се откажат од планираните протести и блокади. Сепак, информираа дека утре нема да ги извршуваат своите редовни превозни услуги.
„Нашиот предлог е Советот на Град Скопје да донесе одлука со која ќе се усвои барањето на приватните превозници за покачување на цената по изминат километар, која моментално изнесува 69 до 70 денари. Предлагаме оваа цена да се зголеми на 100 денари, заклучно со мај 2025 година, период кој го покрива првиот дел од нивниот договор“, изјави Стојановски.
Тој истакна дека приватните превозници го прифатиле предложеното решение и изрази надеж дека вонредната седница ќе се одржи во најкраток можен рок, најдоцна утре или задутре. На седницата, според него, се очекува заедно со останатите советници да го поддржат и изгласаат предлогот.
