Регулаторната комисија за енергетика (РКЕ) усвои нова одлука за највисоките малопродажни цени на нафтените деривати, која ќе почне да се применува од 16 јуни 2026 година во 00:01 часот.
Иако според пресметките на РКЕ просечната корекција на цените бележи минимално намалување од 0,10 проценти, возачите ќе се соочат со поскапување на бензините и дизел-горивото.
Според новиот ценовник, еден литар ЕУРОСУПЕР БС-95 ќе се продава по 87,50 денари, додека цената на ЕУРОСУПЕР БС-98 ќе достигне 90 денари за литар. ЕУРОДИЗЕЛ БС (Д-Е V) ќе чини 87,50 денари за литар.
Од друга страна, екстра лесното масло за домаќинство (ЕЛ-1) ќе се продава по цена од 86,50 денари за литар, а мазутот М-1 НС ќе чини 46,223 денари за килограм.
Во споредба со претходниот ценовник, БС-95 поскапува за 1,50 денари по литар, БС-98 за 2 денари, а дизелот за 0,50 денари по литар.
Намалување има кај екстра лесното масло за домаќинство, чија цена се намалува за 2,50 денари по литар. Поевтинува и мазутот, кој ќе биде понизок за 1,074 денари по килограм.
Од РКЕ посочуваат дека во новата пресметка се вклучени референтните износи на акцизите за бензинските и дизелските горива, бидејќи престанала да важи претходната одлука со која беше изменет начинот на нивно пресметување.
Комисијата нагласува дека станува збор за максимално дозволени малопродажни цени, додека трговците имаат можност горивата да ги продаваат и по пониски цени од утврдените.
Веста ја пренесува Skopje1.mk
