Густ чад и силни детонации утрово предизвикаа хаос во една нова станбена зграда во скопската населба Кисела Вода, при што станарите беа принудени да бегаат од домовите околу 5 часот наутро. Огнот избувнал пред самиот влез на објектот на компанијата „Трим и Лум“, а соседите ја почувствуваа сериозната опасност веднаш, известува МКД.
Станарите раскажуваат дека густата чадна завеса ги заробила во влезот за само неколку минути. Во паника, семејства со мали деца и бебиња трчале по скалите, обидувајќи се да стигнат до улицата. Многумина избегале боси и во пижами, без можност да земат лични предмети или документи.
„Ова е веќе трет пожар во истата зграда за само една година. Жиците долго време беа изложени и небезбедни токму таму каде што играат нашите деца. Пријавувавме во Општина Кисела Вода, доаѓаа инспектори, но сè завршуваше само со записници без реално решение“, велат револтирани станарите.
Жителите сметаат дека пожарот избувнал на главната електрична инсталација пред влезот, каде претходно се изведувале технички работи од екипи на ЕВН. Многумина го опишуваат настанот како сцена од хорор филм, со експлозии кои одекнувале низ целата зграда.
Загриженост кај соседите предизвикува и фактот што во приземјето на објектот функционира детска играоница каде секојдневно престојуваат многу деца.
Пожарот предизвика целосно исклучување на електричната енергија во зградата. Жителите се плашат дека поправката и комплетната санација на оштетената инсталација може да потрае со недели, па дури и до еден месец, што дополнително ќе го отежне нивното секојдневие.
Надлежните инспекции се на терен и вршат детална проверка со цел точно да се утврдат причините за пожарот.
Веста ја пренесува Слободен печат.
