Тинејџер почина од здобиените повреди откако околу 14 часот бил нападнат од двајца млади лица во близина на Хемиското училиште во Лесковац, Србија.
Од Општата болница во Лесковац потврдија дека 16-годишното момче било донесено без знаци на живот.
„Лекарите се обидоа со реанимација, но за жал, не успеаја да го спасат,“ изјави директорот на болницата, Небојша Димитријевиќ. Тој додаде дека на телото на тинејџерот немало видливи траги од сериозни повреди, освен мала гребнатина под окото.
Починатиот бил ученик во трета година во Текстилното училиште. Според неофицијални информации, напаѓачите го претепале со метални прачки, објави „Индекс.хр“. Локалната полиција информираше дека случајот е предаден на Вишото јавно обвинителство за понатамошна истрага.
