Министерството за внатрешни работи поднесе кривична пријава против шестмина осомничени поради сомнение за сторено кривично дело „трговија со деца“, поврзано со организирање и извршување на незаконско посвојување на бебе.
Според истрагата на МВР, осомничените Ф.А. (63), Ѓ.К. (57), И.Ш. (35), Џ.Ш. (35), С.Ј. (35) и И.А. (38) биле вклучени во активности за нелегално посвојување во периодот 2024–2025 година.
Истрагата откри дека Ф.А., која работела како згрижувач на деца, воспоставувала контакти со заинтересирани брачни парови, додека Ѓ.К. посредувала со родители кои се наоѓале во тешка социјална и финансиска ситуација. Родителите биле убедувани да се откажат од своите новородени во замена за пари и други погодности.
Според МВР, С.Ј. и нејзиниот невенчан сопруг И.А. биле убедени да го предадат своето бебе во замена за финансиска помош од 500 евра и бесплатни гинеколошки прегледи. По излегувањето од болницата, мајката и детето биле однесени во дом, каде што И.Ш. и Џ.Ш. го презеле бебето како „посвоители“.
Во текот на истрагата, било утврдено дека во октомври 2025 година бил склучен договор за заем од 500 евра меѓу Џ.Ш. и И.А., парите биле исплатени истиот ден и претставувале надомест за незаконското посвојување.
Судијата од претходната постапка наредил сите осомничени да бидат ставени под мерка домашен притвор.
Веста ја пренесува Skopje1.mk
