Во срцето на Скопје се крие необично научно достигнување за кое малкумина знаат, а кое според познавачите нема сличен пример никаде во светот.
Корисник на социјалната мрежа „Х“, познат под псевдонимот „јас не сум“, неодамна објави низа информации за еден фасцинантен објект поставен на фасадата на Природонаучниот музеј на Македонија.
Станува збор за универзален вертикален сончев и песочен часовник – иновативна конструкција која успешно ги комбинира принципите на сончевото и песочното мерење на времето. Според објавените податоци, овој редок изум е дело на Коља Асенов, првиот професор по астрономија во Македонија.
Часовникот, висок околу два метри, не служи само за покажување на времето. На него се прикажани основните правци, линии и рамнини на небесната сфера, како и сферните координатни системи што се користат во астрономските набљудувања и пресметки.
Она што го прави навистина посебен е фактот што покрај сончевиот механизам содржи и песочен часовник кој овозможува следење на недели, месеци и години. Дополнително, системот е осмислен така што времето може да се пресметува според повеќе календарски системи, меѓу кои христијанскиот, еврејскиот, исламскиот и календарот на Маите.
Според информациите споделени на социјалните мрежи, овој необичен часовник е проектиран да функционира со векови и се смета за едно од најинтересните, а воедно и најмалку познати научни обележја во главниот град.
Скопје така крие уште еден редок бисер кој ги спојува науката, астрономијата и инженерството во единствена целина што привлекува внимание и восхит.
Веста ја пренесува Hypetv.mk
