По инцидентот со свлечиштето во Капиштец, експертите утврдиле сериозни пропусти при изведбата на градежните работи, а дел од активностите биле реализирани спротивно на одобрената техничка документација и без соодветен стручен надзор.
Жителите на улицата „Христо Смирненски“ во понеделникот беа сведоци на драматично свлекување на земјиштето за време на ископ за нова зграда, по што Општина Центар веднаш формираше кризен штаб и побара стручна помош од Градежниот факултет.
Според препораките на експертите, донесена е одлука градежната јама целосно да се затрупа и теренот да се врати во првобитна состојба, со цел да се спречат нови оштетувања и опасности за околните објекти и улици.
Деканот на Градежниот факултет, Јосиф Јосифовски, информираше дека при увидот биле забележани повеќе нерегуларности, меѓу кои и недостаток на заштитни конструкции и несоодветно обезбедување на просторот.
– Работите не биле изведени согласно проектот, а очигледно недостигал и стручен надзор на терен – изјави Јосифовски, посочувајќи дека токму тоа придонело за инцидентот.
Тој предупреди дека во Македонија не постои обврска за посебен проект за заштита на градежни јами, што, според него, е една од причините за зачестените свлечишта и небезбедни градилишта.
Во меѓувреме, започна затрупувањето на јамата, а по стабилизирањето на теренот ќе следуваат дополнителни анализи за да се утврди дали има опасност за околните згради и инфраструктурата.
Градоначалникот на Центар, Горан Герасимовски, најави строги санкции против инвеститорот и изведувачот, нагласувајќи дека нема да се толерира несовесно и небезбедно градење.
– Инспекторите веќе констатираа сериозни прекршувања. Ќе следуваат најстроги мерки за сите што не ги почитуваат законите и ја загрозуваат безбедноста на граѓаните – порача Герасимовски.
Од Општината информираат дека инвеститорот ќе мора на сопствен трошок да ги санира сите штети предизвикани од инцидентот, меѓу кои оштетен тротоар, падната бандера и оштетена канализациска мрежа.
Според информациите објавени во медиумите, инвеститори на објектот се компании од Тетово, додека надзорот на проектот го вршела фирма од Гостивар.
Инцидентот се случи на 25 мај околу 13:30 часот, кога при ископ со багер се свлече земјиште и ја затрупа машината. Возачот успеал навреме да се извлече и помина без повреди.
Веста ја пренесува Слободен печат.
