Самир Мане, познат албански бизнисмен, покажува интерес за изградба на модерен комплекс околу езерото „Треска“ и за целосна ревитализација на самиот воден простор. Негова компанија, „Балфин груп“, веќе остави значителен белег во Скопје со изградбата на „Ист Гејт Мол“ и станбените згради во неговата околина, што ја потврдува неговата желба да продолжи со инвестирање во земјава.
Мане имал и средба со премиерот Христијан Мицкоски, министерот за транспорт Александар Николоски и градоначалникот на општина Сарај, Мухамед Елмази, каде го претставил својот визионерски план за овој простор.
Градоначалникот Елмази во емисијата „Дијалог на Лајме“ истакна дека Мане е подготвен да вложи повеќе од 100 милиони евра, додавајќи дека бизнисменот презентирал временска рамка за реализација и ставување во функција на проектот.
„Се работи за сериозна инвестиција која ќе ги следи сите законски и административни процедури. Господин Мане има искуство со проекти од ваков калибар во други земји и се надеваме дека истото чудо ќе го донесе и во нашата општина“, рече Елмази, нагласувајќи дека ова е една од најголемите приватни инвестиции во регионот.
Веста ја пренесува Слободен печат.
