Младиот македонски музички талент Андреј Цековски постигна голем меѓународен успех, освојувајќи Прва награда на реномираниот натпревар International Youth Music Competitions во категоријата „USA Classical Hobbyist“, кој се одржа во март 2026 година.
Андреј е ученик во V одделение во нижото музичко училиште при ДМБУЦ „Илија Николовски-Луј“, а негов ментор е професорката по пијано Марија Диманин Богоевска. Со својот извонреден настап, тој успеа да се издвои меѓу бројните учесници од различни држави, оставајќи силен впечаток кај жирито со својата музикалност, техничка подготвеност и сценска зрелост.
Од организацијата на натпреварот истакнале дека Андреј покажал исклучителен талент и посветеност кон класичната музика, што му донело високо признание на меѓународно ниво.
Како круна на успехот, младиот пијанист доби официјална покана во септември да отпатува во Њујорк, каде свечено ќе му биде врачена наградата, а воедно ќе настапи и на концертот на победниците.
На овој престижен музички натпревар учествувале млади таленти од повеќе земји, меѓу кои Австралија, Канада, Кина, Полска, Украина, Турција и САД. Освоеното прво место уште еднаш потврдува дека Андреј Цековски е млад уметник со голем потенцијал и светла иднина на меѓународната музичка сцена.
Веста ја пренесува Kurir.mk
