Рано утрово, околу 5 часот, на паркинг во близина на Технолошко-металуршкиот факултет во Скопје изби пожар во кој целосно изгореа две патнички возила. Брзата реакција на противпожарните екипи спречила огнот да се прошири и да зафати други автомобили и околни објекти.
Станари од блиските згради сведочат дека непосредно пред да го забележат пламенот слушнале необични звуци кои наликувале на пукање, а во воздухот се чувствувал силен и непријатен мирис.
Пожарот се случил на паркинг простор исполнет со повеќе возила, што создало ризик од значително поголема материјална штета. За среќа, пламенот бил локализиран на само две возила кои целосно изгореле.
Некои жители изразуваат сомнежи дека пожарот можеби не е случаен, но засега нема официјални информации кои го потврдуваат тоа.
Во близина на локацијата се наоѓа и Амбасадата на Унгарија, но нема податоци за каква било опасност или влијание врз објектот.
Полицијата и надлежните служби извршиле увид на местото на настанот и работат на утврдување на причините за избувнувањето на пожарот.
Веста ја пренесува Skopje1.mk
