76-годишна жена од Скопје пријавила во полиција дека била измамена за износ од 479.540 денари (околу 6.000 евра) од страна на лице со кое стапила во контакт преку социјална мрежа.
Според пријавата поднесена на 13 ноември 2024 година во 16:30 часот во СВР Скопје, жената комуницирала со осомниченото лице во периодот од февруари до 12 ноември 2024 година. Во текот на комуникацијата, лицето ја убедило да купи мобилни телефони и да испрати парични средства за наводни хуманитарни цели, со ветување дека потрошените средства ќе ѝ бидат вратени.
Како што е пријавено, таа купила вкупно шест мобилни телефони, кои ги испратила на две адреси во Гана преку брза пошта. Дополнително, на барање на лицето, испратила парични средства преку брз трансфер на пари на трета личност во Италија. Сепак, ветената повратка на средствата никогаш не се случила, по што жената сфатила дека е измамена.
Полицијата активно работи на случајот за идентификација на сторителите, кои со манипулација и злоупотреба на довербата ја измамиле жртвата.
