Вработените од ЈП „Улици и патишта“ – Скопје најавија протест пред просториите на Град Скопје, каде планираат да пристигнат со механизацијата на претпријатието. Причината за протестот се должи на сериозните проблеми со доцнењето и исплатата на платите.
Сепак, точниот датум на одржување на протестот сè уште не е објавен. Вработените предупредуваат дека претпријатието се соочува со значителни финансиски потешкотии.
Во нивното соопштение се посочува дека овие проблеми произлегуваат од, како што велат, неефикасното управување од страна на градоначалничката Данела Арсовска, директорот Ристо Глигоров, како и поранешниот директор Ванчо Умленски.
„Поради несоодветното раководење на споменатите лица, нашето претпријатие повторно е во финансиска криза, што директно влијае врз редовната исплата на личните примања“, се вели во соопштението од вработените.
