Министерството за внатрешни работи (МВР) ги предупредува граѓаните на зголемена активност на измамници, кои преку социјалните мрежи се претставуваат како „финансиски советници“ и нудат услуги за тргување со криптовалути. Овие лица често користат лажни профили или спонзорирани реклами, во кои ветуваат високи заработки и брзи добивки, со што привлекуваат жртви кои бараат инвестиции во криптовалути.
По воспоставувањето првичен контакт преку социјалните мрежи, измамниците обично преминуваат на телефонски повици, користејќи VOIP броеви кои изгледаат како локални, за да создадат доверба. Во текот на разговорите, тие ги убедуваат жртвите да инсталираат софтвер за далечински пристап, наводно за да им помогнат при поставување на платформи за тргување со криптовалути.
Откако ќе добијат далечински пристап до компјутерите или мобилните уреди на жртвите, измамниците ја земаат контролата над нивните електронски банкарски сметки и префрлаат парични средства. Во многу случаи, жртвите остануваат без средства, често без да сфатат дека биле измамени, а штетите се значителни, посочуваат од МВР.
Секторот за компјутерски криминал ги советува граѓаните да бидат особено внимателни кога комуницираат со непознати лица кои нудат финансиски совети преку интернет.
„Никогаш не инсталирајте софтвер за далечински пристап на барање на непознати лица, и избегнувајте повици од непознати или сомнителни броеви. Ако имате било какви сомнежи дека сте жртва на измама, веднаш контактирајте со вашата банка и пријавете го случајот во Министерството за внатрешни работи“, порачуваат од полицијата.
