Во чест на 80-годишнината од ослободувањето на Скопје, градоначалникот на Општина Илинден, Александар Георгиевски, денеска го посети 103-годишниот Наце Петрушевски од селото Бучинци, кој е последниот жив борец од оваа општина што учествувал во Народноослободителната борба (НОБ) за време на Втората светска војна.
Со длабока почит кон неговата храброст и посветеност во борбата за слободата на Македонија, градоначалникот Георгиевски му врачи почесна плакета на дедо Наце. Овој симболичен чин претставува признание за неговиот несебичен придонес и исклучителната жртва што ја дал за слободата на татковината.
На овој настан присуствуваше и Никола Ангеловски – Коле, кој со своите 90 години е најмладиот курир што учествувал во Народноослободителната борба. Заедно со Петрушевски, тие ги споделија своите спомени од деновите на отпорот, говорејќи за храброста, предизвиците и пожртвуваноста што ги одбележале нивните животи.
Како дел од оваа свечена средба, дедо Наце ги почести присутните со изведба на македонска патриотска песна, со што ја долови атмосферата на тој период и ги врати присутните назад во времето кога борбата за слободата била врвен приоритет. Песната, како и неговото сведоштво, го истакнаа неговиот нераскинлив дух и огромната љубов кон Македонија, која ја носи со себе низ целиот свој живот.
