Пред 17 години, Славиша Јовановиќ од околината на Ниш ја продал својата земја на локалните власти со цел проширување на гробиштата. Меѓутоа, поради тоа што општината не ја исплатила целата сума за земјиштето, Јовановиќ бил принуден да поднесе тужба против нив.
По долги 10 години судска постапка, судот донел пресуда во негова корист – земјата му била вратена, но заедно со неа и 150 погребани тела на неговите сограѓани и роднини. Ова го стави и селото во неочекуван проблем, бидејќи Јовановиќ, како нов сопственик на гробиштата, нема овластување да организира погреби, што дополнително ја комплицира ситуацијата.
Еден од клучните фактори за настанатата компликација е фактот што општината не го исплатила целосно купопродажниот договор. „Градот не платил целосно, и затоа овој проблем настана,“ изјави Жарко Рајковиќ, претседател на Советот на граѓани на Доњи Меѓуров.
Славиша Јовановиќ изразува големо разочарување и вознемиреност поради новонастанатата ситуација. „Едноставно не можам да се помирам со ова. Толку многу ми е непријатно што не можам да спијам навечер“, вели Јовановиќ, кој се соочува со реалноста дека земјата, која во 2007 година ја продал за гробишта, сега е негово сопствеништво, но со 150 закопани луѓе на неа.
„Сега треба да ги тужам сите затоа што ги закопале своите починати блиски и да барам да ги ексхумираат и пренесат на друго место“, додава Јовановиќ за српскиот медиум „Н1“, изразувајќи ја сложеноста на ситуацијата во која се нашол.
