Синоќа повторно се активираше пожарот на планината Беласица во близина на селото Смоларе, кој се приближи опасно блиску до црквата „Свети Петар и Павле“, соопштија денеска од Територијалната противпожарна единица Струмица.
Веднаш по добивањето на првите повици од жителите на селото, ТППЕ Струмица испратила екипа на пожарникари-спасители. Иако теренот е многу тежок за пристап, пожарникарите успеале да стигнат до фронталната линија на пожарот и да го спречат неговото понатамошно ширење во правец на црквата.
Струмичките пожарникари објаснија дека и покрај ниските температури, пожарот брзо се шири поради специфичната теренска конфигурација и големата количина на суви лисја и друг запаллив материјал на земјата. Овие фактори придонесуваат за развивање на високи температури, кои го зголемуваат интензитетот на огнот, овозможувајќи му да се префрли од површината на земјата кон крошните на дрвјата, што дополнително го отежнува гаснењето.
