Водата од водоводната мрежа во Берово моментално може да се користи само за технички цели, информираа од Јавното претпријатие за комунални работи „Услуга“ – Берово.
Оваа одлука е донесена врз основа на известувањето од Агенцијата за храна и ветеринарство – Сектор за инспекциски надзор ПЕ – Берово, која на 12.11.2024 година издаде Решение под број 26-772.
Во известувањето се наведува дека ЈПКР „Услуга“ Берово има забрана за користење на водата од водоводната мрежа за пиење и готвење, додека не се обезбедат безбедни услови за нејзина употреба. До тогаш, водата може да се користи само за технички намени. Дополнително, се бара од претпријатието да преземе соодветни мерки за прочистување на водата, со цел таа повторно да биде безбедна за консумација.
Оваа одлука е донесена поради отстапување на параметрите за квалитет на водата според физичко-хемиските анализи, кои покажале зголемена концентрација на манган, што е во спротивност со стандардите утврдени во Правилникот за вода за пиење.
