Милано е градот со најголема концентрација на милионери во светот – еден на секои 12 жители. Така, италијанската метропола ги надмина Њујорк и Лондон, но истовремено ги продлабочи социјалните разлики и кризата со достапните станови.
Во апсолутни бројки, според „Ил Соле 24 Оре“, во Милано живеат околу 115.000 милионери, што го става градот на самиот врв на светската листа. Уште повпечатлива е концентрацијата на екстремно богатите: 182 лица со средства над 100 милиони евра, односно еден таков човек на секои 7.962 жители. Милијардери има 17, од вкупно 79 во цела Италија.
За споредба, во Њујорк има 22 жители на еден милионер, додека во Лондон соодносот е 41:1. Париз е поблиску до Милано со 1:14, додека во Рим има еден милионер на секои 54 жители.
Главните причини за ова се улогата на Милано во финансиите, модата и дизајнот, висок квалитет на живот и развиена инфраструктура. Но, клучен фактор е и даночната политика. Во 2017 година, Италија воведе посебен режим за богатите странци: оние што се преселуваат во Италија можат да платат фиксен годишен данок од 300.000 евра, без оглед на реалниот доход остварен во странство. Од 2018 до 2023 година, режимот го користеле 3.983 странски даночни обврзници.
Дополнително, многу поволниот данок на наследство (само 4%) го прави Милано идеално место за пренос на големо богатство меѓу генерации.
Но, овој успех има и темна страна.
Денес, Милано бележи најголеми разлики во приходите помеѓу центарот и периферијата. Секој трет вработен заработува недоволно за да ги покрие основните трошоци, најмногу поради домувањето. Пазарот на недвижности е експлодирал: цените се зголемиле за над 40% споредено со периодот пред пандемијата.
Просечната цена по квадратен метар надминува 6.000 евра, во историскиот центар над 11.000, а во луксузните области како Квадрилатера Моде и Брера достигнува и до 27.000 евра. Во исто време, околу 60.000 луѓе се на листи за социјални станови.
Ова е парадоксот на модерното Милано – град кој привлекува најбогатите и капиталот, но станува сè потешко место за живот за обичниот човек.
