Основното јавно обвинителство во Кичево донесе одлука за покренување истрага против лице од селото Грешница, кое е осомничено за нелегално производство, поседување, посредување и трговија со оружје и експлозивни материи, според член 396 став 5 во врска со став 3 од Кривичниот законик.
Во претрес на простории кои осомничениот ги користел, но биле во сопственост на друго лице, полицијата открила значителна количина оружје, муниција и делови од огнено оружје. Меѓу пронајденото се три автоматски пушки, 188 куршуми со калибар за автоматска пушка, една ловна пушка и 10 ловни патрони, како и една двоцевна пушка.
Поради постоење на околности кои укажуваат на можност осомничениот да избега, повторно да го изврши делото или да влијае врз сведоците во текот на постапката, јавниот обвинител поднесе предлог до судијата за претходна постапка при Основниот суд во Кичево за определување мерка притвор. Предлогот беше прифатен, а осомничениот е ставен во притвор за период од 30 дена.
